Florida Plane Crash: ਦੱਖਣੀ ਫਲੋਰੀਡਾ ਦੇ ਰਿਹਾਇਸ਼ੀ ਇਲਾਕੇ ’ਚ ਪ੍ਰਾਈਵੇਟ ਜੈੱਟ ਹਾਦਸਾਗ੍ਰਸਤ, ਸਵਾਰ ਸਾਰੇ 9 ਲੋਕਾਂ ਦੀ ਮੌਤ
ਹਾਦਸੇ ਤੋਂ ਪਹਿਲਾਂ ਪਾਇਲਟ ਨੇ ਦਿੱਤਾ ‘ਮੇਡੇ’ ਦਾ ਸੰਕੇਤ, ਤੇਜ਼ੀ ਨਾਲ ਉਚਾਈ ਗੁਆਉਣ ਮਗਰੋਂ ਜ਼ਮੀਨ ਨਾਲ ਟਕਰਾਇਆ ਜਹਾਜ਼; ਐੱਨਟੀਐੱਸਬੀ ਵੱਲੋਂ ਜਾਂਚ ਸ਼ੁਰੂ
ਫਲੋਰੀਡਾ (ਅਮਰੀਕਾ): ਅਮਰੀਕਾ ਦੇ ਦੱਖਣੀ ਫਲੋਰੀਡਾ ਵਿੱਚ ਐਤਵਾਰ ਦੁਪਹਿਰ ਇੱਕ ਭਿਆਨਕ ਹਵਾਈ ਹਾਦਸਾ ਵਾਪਰਿਆ। ਪਾਮ ਬੀਚ ਕਾਉਂਟੀ ਦੇ ਰਿਹਾਇਸ਼ੀ ਇਲਾਕੇ ਵਿੱਚ ਇੱਕ ਨਿੱਜੀ ਲੀਅਰਜੈੱਟ ਜਹਾਜ਼ ਜ਼ਮੀਨ ਨਾਲ ਟਕਰਾ ਗਿਆ। ਅਮਰੀਕੀ ਹਵਾਬਾਜ਼ੀ ਅਧਿਕਾਰੀਆਂ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਹਾਦਸੇ ਵਿੱਚ ਜਹਾਜ਼ ਵਿੱਚ ਸਵਾਰ ਸਾਰੇ ਨੌਂ ਵਿਅਕਤੀਆਂ ਦੀ ਮੌਤ ਹੋ ਗਈ।
ਫੈਡਰਲ ਏਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (ਐੱਫਏਏ) ਮੁਤਾਬਕ ਇਹ ਪ੍ਰਾਈਵੇਟ ਜੈੱਟ ਟੈਕਸਾਸ ਦੇ ਔਸਟਿਨ-ਬਰਗਸਟ੍ਰੋਮ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਰਵਾਨਾ ਹੋਇਆ ਸੀ ਅਤੇ ਬਹਾਮਾਸ ਦੇ ਨੌਰਥ ਐਲੂਥੇਰਾ ਹਵਾਈ ਅੱਡੇ ਵੱਲ ਜਾ ਰਿਹਾ ਸੀ।
ਜ਼ਮੀਨ ਨਾਲ ਟਕਰਾਉਂਦਿਆਂ ਹੀ ਹੋਇਆ ਜ਼ਬਰਦਸਤ ਧਮਾਕਾ
ਸੋਸ਼ਲ ਮੀਡੀਆ ਉੱਤੇ ਸਾਹਮਣੇ ਆਈਆਂ ਵੀਡੀਓਜ਼ ਵਿੱਚ ਜਹਾਜ਼ ਨੂੰ ਇੱਕ ਸੜਕ ਦੇ ਨੇੜੇ ਤੇਜ਼ ਰਫ਼ਤਾਰ ਨਾਲ ਜ਼ਮੀਨ ਵੱਲ ਡਿੱਗਦਿਆਂ ਅਤੇ ਟਕਰਾਉਣ ਮਗਰੋਂ ਧਮਾਕਾ ਹੁੰਦਿਆਂ ਦਿਖਾਇਆ ਗਿਆ ਹੈ।
ਹਾਦਸੇ ਕਾਰਨ ਜਹਾਜ਼ ਦਾ ਮਲਬਾ ਆਲੇ-ਦੁਆਲੇ ਖਿੱਲਰ ਗਿਆ। ਘਟਨਾ ਤੋਂ ਬਾਅਦ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ।
ਗਵਰਨਰ ਰੋਨ ਡਿਸੈਂਟਿਸ ਨੇ ਜਤਾਇਆ ਦੁੱਖ
ਲੇਕ ਵਰਥ ਬੀਚ ਵਿੱਚ ਹਾਦਸੇ ਵਾਲੀ ਥਾਂ ਨੇੜੇ ਕੀਤੀ ਪ੍ਰੈੱਸ ਕਾਨਫਰੰਸ ਦੌਰਾਨ ਫਲੋਰੀਡਾ ਦੇ ਗਵਰਨਰ ਰੋਨ ਡਿਸੈਂਟਿਸ ਨੇ ਇਸ ਘਟਨਾ ਨੂੰ ਵੱਡੀ ਤ੍ਰਾਸਦੀ ਕਰਾਰ ਦਿੱਤਾ।
ਉਨ੍ਹਾਂ ਕਿਹਾ ਕਿ ਹਾਦਸੇ ਦੀਆਂ ਵੀਡੀਓਜ਼ ਬੇਹੱਦ ਝੰਜੋੜਨ ਵਾਲੀਆਂ ਹਨ। ਉਨ੍ਹਾਂ ਮੁਤਾਬਕ ਜਹਾਜ਼ ਇੰਨੀ ਤੇਜ਼ੀ ਨਾਲ ਹੇਠਾਂ ਡਿੱਗਿਆ ਕਿ ਉਸ ਦਾ ਜ਼ਮੀਨ ਨਾਲ ਟਕਰਾਉਣਾ ਕਿਸੇ ਮਿਜ਼ਾਈਲ ਦੇ ਡਿੱਗਣ ਵਰਗਾ ਲੱਗ ਰਿਹਾ ਸੀ। ਟੱਕਰ ਤੋਂ ਬਾਅਦ ਜ਼ਬਰਦਸਤ ਧਮਾਕਾ ਹੋਇਆ ਅਤੇ ਮਲਬਾ ਚਾਰੇ ਪਾਸੇ ਫੈਲ ਗਿਆ।
ਹਾਦਸੇ ਤੋਂ ਪਹਿਲਾਂ ਕਾਕਪਿਟ ਵਿੱਚੋਂ ਦਿੱਤੀ ਗਈ ਸੀ ਐਮਰਜੈਂਸੀ ਕਾਲ
ਪ੍ਰਾਪਤ ਵੇਰਵਿਆਂ ਅਨੁਸਾਰ ਹਾਦਸੇ ਤੋਂ ਕੁਝ ਸਮਾਂ ਪਹਿਲਾਂ ਜਹਾਜ਼ ਦੇ ਕਾਕਪਿਟ ਵਿੱਚੋਂ ਏਅਰ ਟ੍ਰੈਫਿਕ ਕੰਟਰੋਲ ਨਾਲ ਸੰਪਰਕ ਕੀਤਾ ਗਿਆ ਸੀ।
ਕਾਕਪਿਟ ਵਿੱਚ ਮੌਜੂਦ ਵਿਅਕਤੀ ਨੇ ਦੱਸਿਆ ਕਿ ਉਹ ਜਹਾਜ਼ ਉੱਤੇ ਬਰਫ਼ ਜੰਮਣ ਨਾਲ ਸਬੰਧਤ ਸਥਿਤੀ ਨੂੰ ਸੰਭਾਲ ਰਹੇ ਹਨ। ਇਸ ਦੇ ਨਾਲ ਹੀ ਜਹਾਜ਼ ਨੂੰ ਦਰਮਿਆਨੇ ਪੱਧਰ ਦੀ ਹਵਾਈ ਹਲਚਲ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਅਤੇ ਚਾਲਕ ਦਲ ਵਧੇਰੇ ਸੁਖਾਵੀਂ ਉਡਾਣ ਵਾਲੇ ਰਸਤੇ ਦੀ ਭਾਲ ਕਰ ਰਿਹਾ ਸੀ।
ਇਸ ਗੱਲਬਾਤ ਤੋਂ ਇੱਕ ਮਿੰਟ ਤੋਂ ਵੀ ਘੱਟ ਸਮੇਂ ਬਾਅਦ ਕਾਕਪਿਟ ਵਿੱਚੋਂ ‘ਮੇਡੇ, ਮੇਡੇ’ ਦਾ ਐਮਰਜੈਂਸੀ ਸੰਕੇਤ ਦਿੱਤਾ ਗਿਆ।
ਕੁਝ ਸਕਿੰਟਾਂ ਵਿੱਚ ਹੀ ਤੇਜ਼ੀ ਨਾਲ ਹੇਠਾਂ ਡਿੱਗਣ ਲੱਗਾ ਜਹਾਜ਼
ਐਮਰਜੈਂਸੀ ਸੰਦੇਸ਼ ਦੌਰਾਨ ਕਾਕਪਿਟ ਵਿੱਚੋਂ ਦੱਸਿਆ ਗਿਆ ਕਿ ਜਹਾਜ਼ ਅਚਾਨਕ 10,000 ਫੁੱਟ ਪ੍ਰਤੀ ਮਿੰਟ ਦੀ ਦਰ ਨਾਲ ਉਚਾਈ ਗੁਆ ਰਿਹਾ ਹੈ।
ਕੁਝ ਹੀ ਸਕਿੰਟਾਂ ਬਾਅਦ ਚਾਲਕ ਦਲ ਨੇ ਦੱਸਿਆ ਕਿ ਹੇਠਾਂ ਡਿੱਗਣ ਦੀ ਦਰ ਵਧ ਕੇ 20,000 ਫੁੱਟ ਪ੍ਰਤੀ ਮਿੰਟ ਹੋ ਗਈ ਹੈ।
ਇਸ ਤੋਂ ਬਾਅਦ ਸਥਿਤੀ ਹੋਰ ਗੰਭੀਰ ਹੋ ਗਈ ਅਤੇ 20 ਸਕਿੰਟਾਂ ਤੋਂ ਵੀ ਘੱਟ ਸਮੇਂ ਵਿੱਚ ਜਹਾਜ਼ ਦੇ ਜ਼ਮੀਨ ਨਾਲ ਟਕਰਾਉਣ ਦਾ ਖ਼ਤਰਾ ਸਾਹਮਣੇ ਆ ਗਿਆ।
ਕਾਕਪਿਟ ਵਿੱਚੋਂ ਆਖਿਆ ਗਿਆ ਕਿ ਜਹਾਜ਼ ਜ਼ਮੀਨ ਨਾਲ ਟਕਰਾਉਣ ਵਾਲਾ ਹੈ। ਇਸ ਦੌਰਾਨ ਹੇਠਾਂ ਡਿੱਗਣ ਦੀ ਦਰ ਕਰੀਬ 22,000 ਫੁੱਟ ਪ੍ਰਤੀ ਮਿੰਟ ਤੱਕ ਪਹੁੰਚ ਗਈ ਸੀ ਅਤੇ ਜਹਾਜ਼ ਇੱਕ ਪਾਸੇ ਝੁਕਣਾ ਸ਼ੁਰੂ ਹੋ ਗਿਆ ਸੀ।
ਆਖ਼ਰੀ ਸੰਦੇਸ਼—‘ਸਾਡੇ ਕੋਲ ਸਮਾਂ ਖ਼ਤਮ ਹੋ ਗਿਆ ਹੈ’
ਰਿਪੋਰਟ ਮੁਤਾਬਕ ਪਹਿਲੀ ‘ਮੇਡੇ’ ਕਾਲ ਤੋਂ ਲਗਪਗ 35 ਸਕਿੰਟਾਂ ਬਾਅਦ ਕਾਕਪਿਟ ਵਿੱਚੋਂ ਆਖ਼ਰੀ ਸੰਦੇਸ਼ ਸੁਣਿਆ ਗਿਆ।
ਇਸ ਸੰਦੇਸ਼ ਵਿੱਚ ਤੇਜ਼ੀ ਨਾਲ ਕਿਹਾ ਗਿਆ ਕਿ ਉਨ੍ਹਾਂ ਕੋਲ ਹੁਣ ਸਮਾਂ ਨਹੀਂ ਬਚਿਆ। ਇਸ ਤੋਂ ਤੁਰੰਤ ਬਾਅਦ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ।
ਫਲਾਈਟ ਟ੍ਰੈਕਿੰਗ ਵੈੱਬਸਾਈਟ ਫਲਾਈਟਰਾਡਾਰ24 ਦੇ ਅੰਕੜਿਆਂ ਅਨੁਸਾਰ ਇੱਕ ਸਮੇਂ ਜਹਾਜ਼ ਦੀ ਹੇਠਾਂ ਡਿੱਗਣ ਦੀ ਦਰ 32,000 ਫੁੱਟ ਪ੍ਰਤੀ ਮਿੰਟ ਤੋਂ ਵੀ ਵੱਧ ਦਰਜ ਕੀਤੀ ਗਈ ਸੀ।
ਐੱਨਟੀਐੱਸਬੀ ਵੱਲੋਂ ਹਾਦਸੇ ਦੀ ਜਾਂਚ ਸ਼ੁਰੂ
ਅਮਰੀਕਾ ਦੇ ਨੈਸ਼ਨਲ ਟ੍ਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (ਐੱਨਟੀਐੱਸਬੀ) ਨੇ ਜਹਾਜ਼ ਹਾਦਸੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਅਮਰੀਕੀ ਆਵਾਜਾਈ ਸਕੱਤਰ ਸੀਨ ਡਫੀ ਨੇ ਵੀ ਇਸ ਘਟਨਾ ਨੂੰ ਭਿਆਨਕ ਤ੍ਰਾਸਦੀ ਦੱਸਿਆ ਹੈ।
ਐੱਫਏਏ ਦੇ ਰਿਕਾਰਡ ਮੁਤਾਬਕ ਹਾਦਸਾਗ੍ਰਸਤ ਜਹਾਜ਼ ਬੋਮਬਾਰਡੀਅਰ ਕੰਪਨੀ ਵੱਲੋਂ ਬਣਾਇਆ ਗਿਆ ਲੀਅਰਜੈੱਟ 60 ਸੀ, ਜਿਸ ਦੀ ਮਾਲਕੀ ਡੇਲਾਵੇਅਰ ਵਿੱਚ ਰਜਿਸਟਰਡ ਇੱਕ ਕਾਰਪੋਰੇਸ਼ਨ ਦੇ ਨਾਂ ਦਰਜ ਹੈ।
ਫਿਲਹਾਲ ਹਾਦਸੇ ਦੇ ਅਸਲ ਕਾਰਨਾਂ ਬਾਰੇ ਅੰਤਿਮ ਨਤੀਜਾ ਸਾਹਮਣੇ ਨਹੀਂ ਆਇਆ। ਜਾਂਚ ਏਜੰਸੀ ਵੱਲੋਂ ਜਹਾਜ਼ ਦੀ ਤਕਨੀਕੀ ਸਥਿਤੀ, ਮੌਸਮੀ ਹਾਲਾਤ ਅਤੇ ਉਡਾਣ ਦੇ ਆਖ਼ਰੀ ਪਲਾਂ ਨਾਲ ਸਬੰਧਤ ਜਾਣਕਾਰੀ ਦੀ ਪੜਤਾਲ ਕੀਤੀ ਜਾਵੇਗੀ।
