ਅਮਰੀਕਾ–ਇਜ਼ਰਾਈਲ–ਈਰਾਨ ਦੇ ਤਣਾਅ ਦੇ ਮਾਹੌਲ ਵਿੱਚ ਪੰਜਾਬ ਵਿੱਚ ਪੈਟਰੋਲ ਅਤੇ ਡੀਜ਼ਲ ਨੂੰ ਲੈ ਕੇ ਚਿੰਤਾ ਦਾ ਮਾਹੌਲ ਬਣ ਗਿਆ ਹੈ। ਮੋਗਾ ਵਿੱਚ ਖੁਰਾਕ ਅਤੇ ਸਿਵਲ ਸਪਲਾਈ ਵਿਭਾਗ ਨੇ ਪੈਟਰੋਲ ਪੰਪ ਮਾਲਕਾਂ ਨੂੰ ਐਡਵਾਈਜ਼ਰੀ ਜਾਰੀ ਕਰਕੇ ਡਰੰਮਾਂ ਅਤੇ ਕੈਨੀਆਂ ਵਿੱਚ ਡੀਜ਼ਲ ਭਰਨ ‘ਤੇ ਰੋਕ ਲਗਾ ਦਿੱਤੀ ਹੈ, ਤਾਂ ਜੋ ਜਮ੍ਹਾਂਖੋਰੀ ਅਤੇ ਕਾਲਾਬਾਜ਼ਾਰੀ ਨੂੰ ਰੋਕਿਆ ਜਾ ਸਕੇ।
ਹਾਲਾਂਕਿ ਪੈਟਰੋਲ ਪੰਪ ਐਸੋਸੀਏਸ਼ਨ ਨੇ ਇਸ ਫੈਸਲੇ ਦਾ ਵਿਰੋਧ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਡੀਜ਼ਲ ਸਿਰਫ ਵਾਹਨਾਂ ਹੀ ਨਹੀਂ, ਸਗੋਂ ਮੋਟਰਾਂ, ਜਨਰੇਟਰਾਂ ਅਤੇ ਹੋਰ ਮਸ਼ੀਨਾਂ ਲਈ ਵੀ ਲਾਜ਼ਮੀ ਹੁੰਦਾ ਹੈ, ਜਿਨ੍ਹਾਂ ਨੂੰ ਪੰਪ ਤੱਕ ਲਿਆਉਣਾ ਸੰਭਵ ਨਹੀਂ। ਇਸ ਪਾਬੰਦੀ ਨਾਲ ਲੋਕਾਂ ਵਿੱਚ ਘਬਰਾਹਟ ਹੋਰ ਵੱਧ ਸਕਦੀ ਹੈ।
ਇਸ ਸਮੇਂ ਕਈ ਸ਼ਹਿਰਾਂ ਵਿੱਚ ਪੈਟਰੋਲ ਪੰਪਾਂ ‘ਤੇ ਭੀੜ ਵੇਖਣ ਨੂੰ ਮਿਲ ਰਹੀ ਹੈ, ਪਰ ਸਪਲਾਈ ਜਾਰੀ ਹੈ। ਜਲੰਧਰ ਵਿੱਚ ਬੀਐਮਸੀ ਚੌਕ ਨੇੜੇ ਇੱਕ ਪੈਟਰੋਲ ਪੰਪ, ਜੋ ਪਹਿਲਾਂ ਬਾਲਣ ਦੀ ਘਾਟ ਕਾਰਨ ਬੰਦ ਹੋ ਗਿਆ ਸੀ, ਮੁੜ ਖੁੱਲ੍ਹ ਗਿਆ ਹੈ। ਲੁਧਿਆਣਾ ਵਿੱਚ ਕੁਝ ਪੰਪ ਅਸਥਾਈ ਤੌਰ ‘ਤੇ ਬੰਦ ਰਹੇ ਅਤੇ ਹੁਣ ਕੈਨੀਆਂ ਵਿੱਚ ਬਾਲਣ ਦੇਣ ‘ਤੇ ਰੋਕ ਲਗਾਈ ਗਈ ਹੈ। ਅੰਮ੍ਰਿਤਸਰ ਦੇ ਇੱਕ ਪੰਪ ‘ਤੇ “ਪੈਟਰੋਲ ਆਊਟ ਆਫ ਸਟਾਕ” ਦਾ ਬੋਰਡ ਵੀ ਲੱਗਿਆ ਦਿੱਸਿਆ, ਜਦਕਿ ਚੰਡੀਗੜ੍ਹ ਵਿੱਚ ਵੀ ਡਰੰਮਾਂ ਵਿੱਚ ਡੀਜ਼ਲ ਵੇਚਣਾ ਬੰਦ ਕੀਤਾ ਗਿਆ ਹੈ।
ਦੂਜੇ ਪਾਸੇ, ਪਠਾਨਕੋਟ ਅਤੇ ਮੋਹਾਲੀ ਵਿੱਚ ਹਾਲਾਤ ਆਮ ਹਨ ਅਤੇ ਕੋਈ ਵੱਡੀ ਕਮੀ ਨਹੀਂ ਹੈ। ਐਸੋਸੀਏਸ਼ਨ ਅਤੇ ਅਧਿਕਾਰੀਆਂ ਵੱਲੋਂ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਘਬਰਾਉਣ ਦੀ ਬਜਾਏ ਸਿਰਫ਼ ਆਪਣੀ ਲੋੜ ਮੁਤਾਬਕ ਹੀ ਪੈਟਰੋਲ ਜਾਂ ਡੀਜ਼ਲ ਖਰੀਦਣ।
ਅੰਮ੍ਰਿਤਸਰ ਦੇ ਪੈਟਰੋਲੀਅਮ ਡੀਲਰਾਂ ਦੇ ਪ੍ਰਧਾਨ ਨੇ ਵੀ ਸਪੱਸ਼ਟ ਕੀਤਾ ਕਿ ਅਸਲ ਵਿੱਚ ਕੋਈ ਘਾਟ ਨਹੀਂ, ਲੋਕ ਜ਼ਰੂਰਤ ਤੋਂ ਵੱਧ ਖਰੀਦ ਰਹੇ ਹਨ। ਇਸਦੇ ਨਾਲ ਹੀ ਮੰਤਰੀ ਸੰਜੀਵ ਅਰੋੜਾ ਨੇ ਭਰੋਸਾ ਦਿਵਾਇਆ ਕਿ ਪੈਟਰੋਲ ਅਤੇ ਡੀਜ਼ਲ ਦੀ ਸਪਲਾਈ ਠੀਕ ਹੈ ਅਤੇ ਘਬਰਾਉਣ ਦੀ ਲੋੜ ਨਹੀਂ। ਹਾਲਾਂਕਿ ਵਪਾਰਕ ਐਲਪੀਜੀ ਦੀ ਸਪਲਾਈ ਪ੍ਰਭਾਵਿਤ ਹੋਈ ਹੈ ਅਤੇ ਇਸ ਸਮੇਂ ਲਗਭਗ 20% ਹੀ ਉਪਲਬਧ ਹੈ, ਜਿਸਨੂੰ ਹਸਪਤਾਲਾਂ, ਹੋਸਟਲਾਂ ਅਤੇ ਹੋਰ ਜ਼ਰੂਰੀ ਸੇਵਾਵਾਂ ਲਈ ਪ੍ਰਾਥਮਿਕਤਾ ਦਿੱਤੀ ਜਾ ਰਹੀ ਹੈ। ਪਾਈਪ ਗੈਸ ਦੀ ਸਪਲਾਈ ‘ਤੇ ਕੋਈ ਅਸਰ ਨਹੀਂ ਪਿਆ।
