ਮੱਧ ਪੂਰਬ ਵਿੱਚ Israel ਅਤੇ Iran ਵਿਚਕਾਰ ਵਧ ਰਹੇ ਤਣਾਅ ਦਾ ਅਸਰ ਹੁਣ ਪੰਜਾਬ ਤੱਕ ਵੀ ਪਹੁੰਚਦਾ ਦਿਖਾਈ ਦੇ ਰਿਹਾ ਹੈ। ਫਰੀਦਕੋਟ ਵਿੱਚ ਵਪਾਰਕ ਐਲਪੀਜੀ ਸਿਲੰਡਰਾਂ ਦੀ ਸਪਲਾਈ ਅਸਥਾਈ ਤੌਰ ‘ਤੇ ਰੋਕ ਦਿੱਤੀ ਗਈ ਹੈ। ਸਥਾਨਕ ਗੈਸ ਏਜੰਸੀਆਂ ਨੂੰ ਪਿਛਲੇ ਦੋ ਦਿਨਾਂ ਤੋਂ 19 ਕਿਲੋਗ੍ਰਾਮ ਵਾਲੇ ਕਮਰਸ਼ੀਅਲ ਸਿਲੰਡਰ ਪ੍ਰਾਪਤ ਨਹੀਂ ਹੋਏ। ਤੇਲ ਕੰਪਨੀਆਂ ਦੇ ਪ੍ਰਬੰਧਕਾਂ ਵੱਲੋਂ ਏਜੰਸੀ ਆਪਰੇਟਰਾਂ ਨੂੰ ਮੈਸੇਜ ਕਰਕੇ ਇਹ ਵੀ ਕਿਹਾ ਗਿਆ ਹੈ ਕਿ ਫਿਲਹਾਲ ਵਪਾਰਕ ਸਿਲੰਡਰਾਂ ਲਈ ਨਵੇਂ ਆਰਡਰ ਨਾ ਕੀਤੇ ਜਾਣ।
ਇਸਦੇ ਨਾਲ ਹੀ ਸਰਕਾਰ ਨੇ ਐਲਪੀਜੀ ਸਿਲੰਡਰਾਂ ਸੰਬੰਧੀ ਕੁਝ ਨਵੇਂ ਦਿਸ਼ਾ-ਨਿਰਦੇਸ਼ ਵੀ ਜਾਰੀ ਕੀਤੇ ਹਨ। ਨਵੇਂ ਨਿਯਮਾਂ ਮੁਤਾਬਕ ਹੁਣ ਗੈਸ ਸਿਲੰਡਰ ਸਿਰਫ਼ ਔਨਲਾਈਨ ਬੁਕਿੰਗ ਤੋਂ ਬਾਅਦ ਹੀ ਸਪਲਾਈ ਕੀਤੇ ਜਾਣਗੇ। ਫਰੀਦਕੋਟ ਦੀਆਂ ਗੈਸ ਏਜੰਸੀਆਂ ਦੇ ਆਪਰੇਟਰਾਂ ਨੇ ਦੱਸਿਆ ਕਿ ਖਪਤਕਾਰਾਂ ਨੂੰ ਔਨਲਾਈਨ ਬੁਕਿੰਗ ਕਰਨ ਤੋਂ ਬਾਅਦ ਮਿਲਣ ਵਾਲੇ ਡੀਏਸੀ ਕੋਡ ਦੇ ਆਧਾਰ ‘ਤੇ ਹੀ ਸਿਲੰਡਰ ਦਿੱਤੇ ਜਾਣਗੇ।
ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਕਿਸੇ ਵੀ ਤਰ੍ਹਾਂ ਦੀ ਦਿੱਕਤ ਤੋਂ ਬਚਣ ਲਈ ਉਹ ਆਪਣੀ ਈ-ਕੇਵਾਈਸੀ ਜਲਦੀ ਪੂਰੀ ਕਰਵਾ ਲੈਣ।
ਇਸ ਮਾਮਲੇ ‘ਤੇ ਫਰੀਦਕੋਟ ਦੀ ਜੈਨ ਗੈਸ ਏਜੰਸੀ ਦੇ ਆਪਰੇਟਰ ਸੰਜੀਵ ਜੈਨ ਨੇ ਕਿਹਾ ਕਿ ਭਾਵੇਂ ਮੱਧ ਪੂਰਬ ਵਿੱਚ ਤਣਾਅ ਚੱਲ ਰਿਹਾ ਹੈ, ਪਰ ਅਜੇ ਤੱਕ ਘਰੇਲੂ ਗੈਸ ਦੀ ਸਪਲਾਈ ‘ਚ ਕੋਈ ਵੱਡੀ ਸਮੱਸਿਆ ਨਹੀਂ ਆਈ। ਉਨ੍ਹਾਂ ਮੁਤਾਬਕ ਘਰੇਲੂ ਸਿਲੰਡਰ ਬੁਕਿੰਗ ਤੋਂ ਇੱਕ ਜਾਂ ਦੋ ਦਿਨਾਂ ਦੇ ਅੰਦਰ ਹੀ ਡਿਲੀਵਰ ਕੀਤੇ ਜਾ ਰਹੇ ਹਨ।
ਉਨ੍ਹਾਂ ਦੱਸਿਆ ਕਿ ਮੱਧ ਪੂਰਬ ਵਿੱਚ ਤਣਾਅ ਕਾਰਨ ਵਿਦੇਸ਼ਾਂ ਤੋਂ ਤੇਲ ਦੀ ਸਪਲਾਈ ਪ੍ਰਭਾਵਿਤ ਹੋਈ ਹੈ, ਪਰ ਦੇਸ਼ ਕੋਲ ਇਸ ਵੇਲੇ ਕਾਫੀ ਭੰਡਾਰ ਮੌਜੂਦ ਹਨ, ਜਿਸ ਕਰਕੇ ਘਰੇਲੂ ਗੈਸ ਦੀ ਸਪਲਾਈ ਜਾਰੀ ਹੈ। ਹਾਲਾਂਕਿ ਵਪਾਰਕ ਵਰਤੋਂ ਲਈ ਸਿਲੰਡਰਾਂ ਦੀ ਸਪਲਾਈ ਕੁਝ ਸਮੇਂ ਲਈ ਰੋਕੀ ਗਈ ਹੈ।
ਸੰਜੀਵ ਜੈਨ ਨੇ ਇਹ ਵੀ ਕਿਹਾ ਕਿ ਹੁਣ ਘਰੇਲੂ ਸਿਲੰਡਰ ਸਿਰਫ਼ ਔਨਲਾਈਨ ਬੁਕਿੰਗ ਅਤੇ ਈ-ਕੇਵਾਈਸੀ ਪੂਰੀ ਹੋਣ ਤੋਂ ਬਾਅਦ ਹੀ ਮਿਲਣਗੇ। ਇਸ ਵੇਲੇ ਘਰੇਲੂ ਗੈਸ ਦੀ ਵੱਡੀ ਕਮੀ ਨਹੀਂ, ਪਰ ਸਰਕਾਰ ਆਉਣ ਵਾਲੇ ਸਮੇਂ ‘ਚ ਇਸ ਲਈ ਕੋਟਾ ਤੈਅ ਕਰ ਸਕਦੀ ਹੈ।
ਇਸਦੇ ਨਾਲ ਹੀ ਮਾਲਵਾ ਗੈਸ ਏਜੰਸੀ ਕੋਟਕਪੂਰਾ ਦੇ ਆਪਰੇਟਰ ਜਸਪਾਲ ਸੇਠੀ ਨੇ ਦੱਸਿਆ ਕਿ ਨਵੇਂ ਨਿਯਮਾਂ ਤਹਿਤ ਘਰੇਲੂ ਖਪਤਕਾਰਾਂ ਨੂੰ ਹੁਣ ਅਗਲਾ ਸਿਲੰਡਰ ਲੈਣ ਲਈ ਘੱਟੋ-ਘੱਟ 26 ਦਿਨ ਉਡੀਕ ਕਰਨੀ ਪਵੇਗੀ। ਪਹਿਲਾਂ ਲੋਕ ਡਿਲੀਵਰੀ ਮਿਲਣ ਦੇ ਅਗਲੇ ਦਿਨ ਹੀ ਨਵਾਂ ਸਿਲੰਡਰ ਬੁੱਕ ਕਰ ਸਕਦੇ ਸਨ, ਪਰ ਹੁਣ ਇਹ ਸਹੂਲਤ ਖਤਮ ਕਰ ਦਿੱਤੀ ਗਈ ਹੈ। ਇਹ ਨਵਾਂ ਨਿਯਮ ਗੈਸ ਦੀ ਸੰਭਾਵਿਤ ਘਾਟ ਨੂੰ ਧਿਆਨ ਵਿੱਚ ਰੱਖ ਕੇ ਲਾਗੂ ਕੀਤਾ ਗਿਆ ਹੈ।
