NEET Students Financial Help: ਨੀਟ ਪ੍ਰੀਖਿਆ ਵਿੱਚ ਕਾਮਯਾਬੀ ਹਾਸਲ ਕਰਨ ਦੇ ਬਾਵਜੂਦ ਮੈਡੀਕਲ ਕਾਲਜਾਂ ਦੀ ਭਾਰੀ ਫੀਸ ਕਾਰਨ ਆਪਣੇ ਸੁਪਨੇ ਟੁੱਟਦੇ ਵੇਖ ਰਹੇ ਹੋਣਹਾਰ ਵਿਦਿਆਰਥੀਆਂ ਲਈ ਦਾਨੀ ਸੱਜਣ ਮਸੀਹਾ ਬਣ ਕੇ ਅੱਗੇ ਆਏ ਹਨ। ਆਰਥਿਕ ਤੰਗੀ ਕਾਰਨ ਜਿਨ੍ਹਾਂ ਬੱਚਿਆਂ ਦਾ ਡਾਕਟਰ ਬਣਨ ਦਾ ਸੁਪਨਾ ਅਧੂਰਾ ਰਹਿਣ ਦਾ ਖ਼ਤਰਾ ਬਣ ਗਿਆ ਸੀ, ਉਨ੍ਹਾਂ ਲਈ ਸਮਾਜ ਦੇ ਦਾਨੀ ਲੋਕਾਂ ਨੇ ਮਦਦ ਦਾ ਹੱਥ ਵਧਾਇਆ ਹੈ। ‘ਪੰਜਾਬੀ ਟ੍ਰਿਬਿਊਨ’ ਵਿੱਚ 1 ਸਤੰਬਰ ਨੂੰ ਪ੍ਰਕਾਸ਼ਿਤ ਖ਼ਬਰ ਤੋਂ ਬਾਅਦ ਕਈ ਸੱਜਣ ਇਨ੍ਹਾਂ ਵਿਦਿਆਰਥੀਆਂ ਦੀ ਸਹਾਇਤਾ ਲਈ ਅੱਗੇ ਆਏ ਅਤੇ ਕਰੀਬ 21 ਦਾਨੀਆਂ ਨੇ ਮਿਲ ਕੇ 5.09 ਲੱਖ ਰੁਪਏ ਦੀ ਆਰਥਿਕ ਮਦਦ ਦਿੱਤੀ।
ਮੈਰੀਟੋਰੀਅਸ ਸਕੂਲ ਬਠਿੰਡਾ ਦੇ ਅਧਿਆਪਕ ਮਨਜੀਤ ਸਿੰਘ ਨੇ ਦੱਸਿਆ ਕਿ ਦਾਨੀ ਵਿਅਕਤੀਆਂ ਦੇ ਸਹਿਯੋਗ ਨਾਲ ਕਈ ਲੋੜਵੰਦ ਵਿਦਿਆਰਥੀਆਂ ਦੀ ਦਾਖ਼ਲਾ ਫੀਸ ਦਾ ਪ੍ਰਬੰਧ ਹੋ ਗਿਆ ਹੈ। ਮਲੋਟ ਨੇੜਲੇ ਪਿੰਡ ਆਲਮਵਾਲਾ ਦੇ ਮਹਿਕਦੀਪ ਸਿੰਘ ਨੂੰ ਨੌਂ ਦਾਨੀ ਸੱਜਣਾਂ ਵੱਲੋਂ ਕੁੱਲ 2.75 ਲੱਖ ਰੁਪਏ ਦੀ ਮਦਦ ਪ੍ਰਾਪਤ ਹੋਈ। ਵੱਖ-ਵੱਖ ਸੰਸਥਾਵਾਂ ਅਤੇ ਵਿਅਕਤੀਆਂ ਵੱਲੋਂ ਕੀਤੀ ਗਈ ਇਸ ਸਹਾਇਤਾ ਨੇ ਉਸ ਦਾ ਡਾਕਟਰ ਬਣਨ ਦਾ ਸੁਪਨਾ ਸਾਕਾਰ ਕਰਨ ਦਾ ਰਾਹ ਖੋਲ੍ਹ ਦਿੱਤਾ ਹੈ। ਮਹਿਕਦੀਪ ਨੇ ਬਾਰ੍ਹਵੀਂ ਵਿੱਚ 95.2 ਫ਼ੀਸਦੀ ਅਤੇ ਦਸਵੀਂ ਵਿੱਚ 90 ਫ਼ੀਸਦੀ ਅੰਕ ਹਾਸਲ ਕੀਤੇ ਸਨ। ਉਸ ਦੀ ਪੜ੍ਹਾਈ ਲਈ ਪਰਿਵਾਰ ਨੇ ਕਈ ਤਿਆਗ ਕੀਤੇ, ਇੱਥੋਂ ਤੱਕ ਕਿ ਮਾਪਿਆਂ ਨੂੰ ਆਪਣੇ ਗਹਿਣੇ ਅਤੇ ਪਸ਼ੂ ਵੀ ਵੇਚਣੇ ਪਏ। ਹੁਣ ਦਾਨੀ ਸੱਜਣਾਂ ਦੀ ਮਦਦ ਨਾਲ ਉਸ ਦੀ ਮਿਹਨਤ ਵਿਅਰਥ ਜਾਣ ਤੋਂ ਬਚ ਗਈ ਹੈ।
ਫ਼ਾਜ਼ਿਲਕਾ ਦੇ ਪਿੰਡ ਹੌਜ ਗੰਧੜ ਦੀ ਸੁਮਨਦੀਪ ਕੌਰ ਨੂੰ ਵੀ ਵਿੱਤੀ ਮਦਦ ਮਿਲਣ ਨਾਲ ਮੈਡੀਕਲ ਸਿੱਖਿਆ ਦਾ ਰਾਹ ਸੌਖਾ ਹੋਇਆ ਹੈ। ਉਸ ਨੇ ਬਾਰ੍ਹਵੀਂ ਵਿੱਚ 92 ਫ਼ੀਸਦੀ ਅਤੇ ਦਸਵੀਂ ਵਿੱਚ 90 ਫ਼ੀਸਦੀ ਅੰਕ ਹਾਸਲ ਕੀਤੇ ਸਨ। ਨੀਟ ਵਿੱਚ ਸਫਲ ਹੋਣ ਦੇ ਬਾਵਜੂਦ ਪਰਿਵਾਰ ਫੀਸ ਦਾ ਪ੍ਰਬੰਧ ਕਰਨ ਲਈ ਸੰਘਰਸ਼ ਕਰ ਰਿਹਾ ਸੀ। ਦਾਨੀ ਵਿਅਕਤੀਆਂ ਅਤੇ ਸਥਾਨਕ ਸੰਸਥਾਵਾਂ ਵੱਲੋਂ ਮਿਲੀ ਸਹਾਇਤਾ ਕਾਰਨ ਉਹ ਆਪਣੀ ਦਾਖ਼ਲਾ ਫੀਸ ਜਮ੍ਹਾਂ ਕਰਵਾ ਚੁੱਕੀ ਹੈ ਅਤੇ ਹੁਣ ਡਾਕਟਰੀ ਪੜ੍ਹਾਈ ਸ਼ੁਰੂ ਕਰਨ ਲਈ ਤਿਆਰ ਹੈ।
ਮਲੋਟ ਦੇ ਅਮਨ ਸਿੰਘ ਨੂੰ ਵੀ ਕਈ ਦਾਨੀ ਸੱਜਣਾਂ ਵੱਲੋਂ ਆਰਥਿਕ ਸਹਾਇਤਾ ਦਿੱਤੀ ਗਈ ਹੈ। ਅਮਨ ਨੇ ਬਾਰ੍ਹਵੀਂ ਵਿੱਚ 96.2 ਫ਼ੀਸਦੀ ਅਤੇ ਦਸਵੀਂ ਵਿੱਚ 89.5 ਫ਼ੀਸਦੀ ਅੰਕ ਹਾਸਲ ਕੀਤੇ ਸਨ। ਉਸ ਦੇ ਪਿਤਾ ਫੈਕਟਰੀ ਵਿੱਚ ਮਜ਼ਦੂਰੀ ਕਰਦੇ ਹਨ ਅਤੇ ਪਰਿਵਾਰ ਲਈ ਉੱਚ ਸਿੱਖਿਆ ਦੀ ਫੀਸ ਇਕੱਠੀ ਕਰਨਾ ਬਹੁਤ ਮੁਸ਼ਕਲ ਸੀ। ਸਮਾਜ ਦੇ ਸਹਿਯੋਗ ਨਾਲ ਹੁਣ ਉਸ ਲਈ ਵੀ ਮੈਡੀਕਲ ਸਿੱਖਿਆ ਦੇ ਦਰਵਾਜ਼ੇ ਖੁੱਲ੍ਹ ਗਏ ਹਨ।
ਦਾਨੀ ਸੱਜਣਾਂ ਦਾ ਕਹਿਣਾ ਹੈ ਕਿ ਅਜਿਹੇ ਹੋਣਹਾਰ ਅਤੇ ਮਿਹਨਤੀ ਬੱਚੇ ਸਮਾਜ ਦੀ ਅਸਲ ਪੂੰਜੀ ਹੁੰਦੇ ਹਨ ਅਤੇ ਉਨ੍ਹਾਂ ਦੀ ਮਦਦ ਕਰਨਾ ਹਰ ਸਮਰੱਥ ਵਿਅਕਤੀ ਦਾ ਫ਼ਰਜ਼ ਹੈ।
ਸਰਕਾਰੀ ਮਦਦ ਦੀ ਉਡੀਕ ਜਾਰੀ
ਭਾਵੇਂ ਸਮਾਜ ਦੇ ਦਾਨੀ ਲੋਕਾਂ ਨੇ ਅੱਗੇ ਆ ਕੇ ਇਨ੍ਹਾਂ ਵਿਦਿਆਰਥੀਆਂ ਦਾ ਸਹਾਰਾ ਬਣਿਆ ਹੈ, ਪਰ ਸਰਕਾਰੀ ਪੱਧਰ ’ਤੇ ਹਾਲੇ ਤੱਕ ਕੋਈ ਠੋਸ ਵਿੱਤੀ ਸਹਾਇਤਾ ਨਹੀਂ ਮਿਲੀ। ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਨੇ ਆਪਣੇ ਅਖ਼ਤਿਆਰੀ ਫੰਡ ਵਿੱਚੋਂ ਮਦਦ ਦੇਣ ਦੀ ਇੱਛਾ ਜਤਾਈ ਹੈ। ਇਸੇ ਤਰ੍ਹਾਂ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਅਤੇ ਕੈਬਨਿਟ ਮੰਤਰੀ ਡਾ. ਬਲਜੀਤ ਕੌਰ ਨੇ ਵੀ ਲੋੜਵੰਦ ਵਿਦਿਆਰਥੀਆਂ ਦੀ ਸਹਾਇਤਾ ਲਈ ਯਤਨ ਕਰਨ ਦਾ ਭਰੋਸਾ ਦਿੱਤਾ ਹੈ। ਵਿਦਿਆਰਥੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਉਮੀਦ ਹੈ ਕਿ ਸਰਕਾਰ ਵੱਲੋਂ ਵੀ ਜਲਦ ਕੋਈ ਢੁੱਕਵਾਂ ਕਦਮ ਚੁੱਕਿਆ ਜਾਵੇਗਾ।
