ਦੀਵਾਲੀ ਦੇ ਮੌਕੇ ‘ਤੇ ਗਰੀਬ ਵਰਗ ਨੂੰ ਰਾਹਤ ਦੇਣ ਲਈ ਹਰਿਆਣਾ ਸਰਕਾਰ ਨੇ ਮਹੱਤਵਪੂਰਨ ਫ਼ੈਸਲਾ ਕੀਤਾ ਹੈ। ਸਰਕਾਰ ਨੇ ਬੀਪੀਐਲ ਅਤੇ ਅੰਤਯੋਦਯਾ ਅੰਨ ਯੋਜਨਾ (AAY) ਕਾਰਡਧਾਰਕਾਂ ਲਈ ਫੋਰਟੀਫਾਈਡ ਸਰ੍ਹੋਂ ਦੇ ਤੇਲ ਦੀਆਂ ਨਵੀਆਂ ਕੀਮਤਾਂ ਤੈਅ ਕੀਤੀਆਂ ਹਨ। ਨਵੰਬਰ 2025 ਤੋਂ ਇਹ ਯੋਗ ਪਰਿਵਾਰ ਇੱਕ ਲੀਟਰ ਤੇਲ 30 ਰੁਪਏ ‘ਤੇ ਅਤੇ ਦੋ ਲੀਟਰ ਤੇਲ 100 ਰੁਪਏ ‘ਚ ਪ੍ਰਾਪਤ ਕਰ ਸਕਣਗੇ।
ਇਸ ਯੋਜਨਾ ਦਾ ਮਕਸਦ ਗਰੀਬ ਪਰਿਵਾਰਾਂ ਦੇ ਰੋਜ਼ਾਨਾ ਖਾਣ-ਪੀਣ ਦੇ ਖ਼ਰਚੇ ਵਿੱਚ ਕਮੀ ਲਿਆਉਣਾ ਹੈ। ਖੁਰਾਕ, ਸਿਵਲ ਸਪਲਾਈ ਅਤੇ ਖਪਤਕਾਰ ਮਾਮਲੇ ਵਿਭਾਗ ਵੱਲੋਂ ਨਵੰਬਰ ਮਹੀਨੇ ਲਈ ਤੇਲ ਦੀ ਅਲਾਟਮੈਂਟ ਜਾਰੀ ਕਰ ਦਿੱਤੀ ਗਈ ਹੈ। ਰਾਜ ਭਰ ਵਿੱਚ ਸੁਚਾਰੂ ਵੰਡ ਨੂੰ ਯਕੀਨੀ ਬਣਾਉਣ ਲਈ ਦੋ ਏਜੰਸੀਆਂ ਨੂੰ ਜ਼ਿੰਮੇਵਾਰੀ ਦਿੱਤੀ ਗਈ ਹੈ — HAFED ਨੂੰ 15 ਜ਼ਿਲ੍ਹਿਆਂ ਵਿੱਚ ਤੇਲ ਵੰਡ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ, ਜਦਕਿ Har-Hith (HAICL) 7 ਜ਼ਿਲ੍ਹਿਆਂ ਵਿੱਚ ਵੰਡ ਕਰੇਗਾ।
ਜ਼ਿਲ੍ਹਾ ਖੁਰਾਕ ਅਤੇ ਸਪਲਾਈ ਕੰਟਰੋਲਰ ਮਨੀਸ਼ਾ ਮਹਿਰਾ ਨੇ ਕਿਹਾ ਕਿ ਵੰਡ ਪੂਰੀ ਤਰ੍ਹਾਂ ਸਰਕਾਰੀ ਹਦਾਇਤਾਂ ਮੁਤਾਬਕ ਹੋਵੇਗੀ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਸਿਰਫ਼ ਪ੍ਰਮਾਣਿਤ ਬੀਪੀਐਲ ਅਤੇ ਏਏਵਾਈ ਕਾਰਡਧਾਰਕ ਹੀ ਇਸ ਯੋਜਨਾ ਤਹਿਤ ਤੇਲ ਲੈ ਸਕਣਗੇ। ਤੇਲ ਨਜ਼ਦੀਕੀ ਰਾਸ਼ਨ ਡਿਪੂ ਤੋਂ ਨਿਰਧਾਰਤ ਦਰਾਂ ‘ਤੇ ਦਿੱਤਾ ਜਾਵੇਗਾ ਤਾਂ ਜੋ ਕੋਈ ਵੀ ਲੋੜਵੰਦ ਪਰਿਵਾਰ ਇਸ ਸਹਾਇਤਾ ਤੋਂ ਵਾਂਝਾ ਨਾ ਰਹੇ।
