ਨਰਿੰਦਰ ਮੋਦੀ ਸਟੇਡੀਅਮ ’ਚ ਇਤਿਹਾਸ ਰਚਣਗੇ ਦਿਲਜੀਤ ਦੋਸਾਂਝ, ਸੋਲਡ-ਆਊਟ ਸੋਲੋ ਕੰਸਰਟ ਕਰਨ ਵਾਲੇ ਪਹਿਲੇ ਭਾਰਤੀ ਕਲਾਕਾਰ ਬਣੇ

ਪੰਜਾਬੀ ਗਾਇਕ ਦਿਲਜੀਤ ਦੋਸਾਂਝ ਨੇ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਸਾਰੀਆਂ ਟਿਕਟਾਂ ਵਿਕਣ ਵਾਲਾ ਸੋਲੋ ਕੰਸਰਟ ਕਰਕੇ ਭਾਰਤੀ ਲਾਈਵ ਸੰਗੀਤ ਦੇ ਇਤਿਹਾਸ ਵਿੱਚ ਨਵਾਂ ਅਧਿਆਇ ਜੋੜ ਦਿੱਤਾ ਹੈ। ਇਸ ਪ੍ਰਾਪਤੀ ਨਾਲ ਉਹ ਇਸ ਸਟੇਡੀਅਮ ਵਿੱਚ ਸੋਲਡ-ਆਊਟ ਸੋਲੋ ਕੰਸਰਟ ਕਰਨ ਵਾਲੇ ਪਹਿਲੇ ਭਾਰਤੀ ਗਾਇਕ ਬਣ ਗਏ ਹਨ।

ਦਿਲਜੀਤ ਦੇ ਇਸ ਸੰਗੀਤਕ ਸਮਾਗਮ ਨੂੰ ਸਰੋਤਿਆਂ ਵੱਲੋਂ ਜ਼ਬਰਦਸਤ ਹੁੰਗਾਰਾ ਮਿਲਿਆ। ਰਿਪੋਰਟਾਂ ਅਨੁਸਾਰ, ਪ੍ਰੀ-ਸੇਲ ਦੌਰਾਨ ਹੀ 50 ਹਜ਼ਾਰ ਤੋਂ ਵੱਧ ਟਿਕਟਾਂ ਵਿਕ ਗਈਆਂ ਸਨ। ਇਸ ਕੰਸਰਟ ਵਿੱਚ ਲਗਪਗ 85 ਹਜ਼ਾਰ ਦਰਸ਼ਕਾਂ ਦੇ ਸ਼ਾਮਲ ਹੋਣ ਦੀ ਉਮੀਦ ਸੀ। ਇਸ ਤਰ੍ਹਾਂ ਇਹ ਸਮਾਗਮ ਦਿਲਜੀਤ ਦੇ ਸੰਗੀਤਕ ਸਫ਼ਰ ਦੇ ਨਾਲ-ਨਾਲ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਲਈ ਵੀ ਯਾਦਗਾਰੀ ਬਣ ਗਿਆ।

ਇਹ ਪ੍ਰਾਪਤੀ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਪਹਿਲਾਂ ਵੀ ਕਈ ਵੱਡੇ ਸੰਗੀਤਕ ਸਮਾਗਮ ਹੋ ਚੁੱਕੇ ਹਨ। ਬ੍ਰਿਟਿਸ਼ ਸੰਗੀਤਕ ਬੈਂਡ ‘ਕੋਲਡਪਲੇ’ (Coldplay) ਨੇ ਜਨਵਰੀ 2025 ਵਿੱਚ ਇਸੇ ਸਟੇਡੀਅਮ ਵਿੱਚ ਦੋ ਕੰਸਰਟ ਕੀਤੇ ਸਨ। ਇਨ੍ਹਾਂ ਸਮਾਗਮਾਂ ਦੌਰਾਨ ਭਾਰਤੀ ਗਾਇਕਾ ਜਸਲੀਨ ਰੌਇਲ ਨੇ ਸ਼ੁਰੂਆਤੀ ਪੇਸ਼ਕਾਰੀ (Opening Act) ਦਿੱਤੀ ਸੀ।

ਭਾਵੇਂ ਅਰਿਜੀਤ ਸਿੰਘ ਅਤੇ ਏ.ਆਰ. ਰਹਿਮਾਨ ਵਰਗੇ ਪ੍ਰਸਿੱਧ ਭਾਰਤੀ ਕਲਾਕਾਰ ਵੀ ਇਸ ਸਟੇਡੀਅਮ ਵਿੱਚ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰ ਚੁੱਕੇ ਹਨ, ਪਰ ਉਨ੍ਹਾਂ ਦੀਆਂ ਪੇਸ਼ਕਾਰੀਆਂ ਆਈ.ਪੀ.ਐੱਲ. (IPL) ਦੇ ਉਦਘਾਟਨੀ ਅਤੇ ਸਮਾਪਤੀ ਸਮਾਰੋਹਾਂ ਵਰਗੇ ਵੱਡੇ ਸਮੂਹਿਕ ਪ੍ਰੋਗਰਾਮਾਂ ਦਾ ਹਿੱਸਾ ਸਨ। ਇਸ ਦੇ ਉਲਟ, ਦਿਲਜੀਤ ਦਾ ਇਹ ਪ੍ਰੋਗਰਾਮ ਇੱਕ ਸੁਤੰਤਰ ਅਤੇ ਟਿਕਟ ਆਧਾਰਿਤ ਸੋਲੋ ਕੰਸਰਟ ਸੀ, ਜਿਸ ਦੀ ਪੂਰੀ ਅਗਵਾਈ ਇਕੱਲੇ ਉਨ੍ਹਾਂ ਨੇ ਕੀਤੀ।

ਦਿਲਜੀਤ ਦੀ ਇਹ ਇਤਿਹਾਸਕ ਪ੍ਰਾਪਤੀ ਉਨ੍ਹਾਂ ਦੀ ਦੇਸ਼-ਵਿਦੇਸ਼ ਵਿੱਚ ਲਗਾਤਾਰ ਵਧ ਰਹੀ ਲੋਕਪ੍ਰਿਯਤਾ ਅਤੇ ਪੰਜਾਬੀ ਸੰਗੀਤ ਪ੍ਰਤੀ ਸਰੋਤਿਆਂ ਦੇ ਵਧਦੇ ਰੁਝਾਨ ਦੀ ਗਵਾਹੀ ਭਰਦੀ ਹੈ। ਦੁਨੀਆ ਦੇ ਸਭ ਤੋਂ ਵੱਡੇ ਕ੍ਰਿਕਟ ਸਟੇਡੀਅਮਾਂ ਵਿੱਚੋਂ ਇੱਕ ਵਿੱਚ ਇੰਨੇ ਵੱਡੇ ਪੱਧਰ ’ਤੇ ਸੋਲੋ ਕੰਸਰਟ ਕਰਨਾ ਭਾਰਤੀ ਲਾਈਵ ਮਨੋਰੰਜਨ ਜਗਤ ਵਿੱਚ ਪੰਜਾਬੀ ਸੰਗੀਤ ਦੀ ਮਜ਼ਬੂਤ ਪਛਾਣ ਨੂੰ ਵੀ ਦਰਸਾਉਂਦਾ ਹੈ।