2035 ਤੱਕ ਮੁਸਲਿਮ ਆਬਾਦੀ ਈਸਾਈਆਂ ਤੋਂ ਹੋ ਸਕਦੀ ਹੈ ਵੱਧ, ਪਿਊ ਰਿਸਰਚ ਦੀ ਰਿਪੋਰਟ ’ਚ ਦਾਅਵਾ
ਪਿਊ ਰਿਸਰਚ ਸੈਂਟਰ ਦੀ ਰਿਪੋਰਟ ਮੁਤਾਬਕ ਦੁਨੀਆ ਵਿੱਚ ਧਾਰਮਿਕ ਆਬਾਦੀ ਦਾ ਅਨੁਪਾਤ ਆਉਣ ਵਾਲੇ ਦਹਾਕਿਆਂ ਵਿੱਚ ਬਦਲ ਸਕਦਾ ਹੈ। ਅਨੁਮਾਨ ਹੈ ਕਿ 2035 ਤੱਕ ਮੁਸਲਮਾਨਾਂ ਦੀ ਗਿਣਤੀ ਈਸਾਈਆਂ ਨੂੰ ਪਿੱਛੇ ਛੱਡ ਸਕਦੀ ਹੈ ਅਤੇ ਇਸਲਾਮ ਦੁਨੀਆ ਦਾ ਸਭ ਤੋਂ ਵੱਡਾ ਧਰਮ ਬਣ ਸਕਦਾ ਹੈ। ਇਸ ਵਾਧੇ ਦਾ ਮੁੱਖ ਕਾਰਨ ਮੁਸਲਿਮ ਭਾਈਚਾਰੇ ਵਿੱਚ ਜਨਮ ਦਰ ਦਾ ਵੱਧ ਹੋਣਾ ਦੱਸਿਆ ਗਿਆ ਹੈ।
ਰਿਪੋਰਟ ਅਨੁਸਾਰ 2020 ਵਿੱਚ ਦੁਨੀਆ ਭਰ ਵਿੱਚ 2.27 ਅਰਬ ਈਸਾਈ ਅਤੇ 2.02 ਅਰਬ ਮੁਸਲਮਾਨ ਸਨ। 2035 ਤੱਕ ਮੁਸਲਮਾਨਾਂ ਦੀ ਆਬਾਦੀ 2.57 ਅਰਬ ਅਤੇ ਈਸਾਈਆਂ ਦੀ 2.52 ਅਰਬ ਹੋਣ ਦਾ ਅਨੁਮਾਨ ਹੈ। 2070 ਤੱਕ ਮੁਸਲਮਾਨਾਂ ਦੀ ਗਿਣਤੀ 3.6 ਅਰਬ ਤੋਂ ਪਾਰ ਅਤੇ ਈਸਾਈਆਂ ਦੀ ਕਰੀਬ 3 ਅਰਬ ਹੋ ਸਕਦੀ ਹੈ। 2020 ਤੋਂ 2025 ਦਰਮਿਆਨ ਮੁਸਲਿਮ ਔਰਤਾਂ ਦੀ ਔਸਤ ਪ੍ਰਜਨਨ ਦਰ 3.1 ਬੱਚੇ ਪ੍ਰਤੀ ਔਰਤ ਰਹੀ, ਜਦਕਿ ਈਸਾਈਆਂ ਵਿੱਚ ਇਹ 2.5 ਸੀ।
ਰਿਪੋਰਟ ਵਿੱਚ ਅਮਰੀਕਾ ਅਤੇ ਕੈਨੇਡਾ ਵਿੱਚ ਵੀ ਈਸਾਈ ਆਬਾਦੀ ਦੀ ਹਿੱਸੇਦਾਰੀ ਘਟਣ ਦਾ ਅਨੁਮਾਨ ਲਗਾਇਆ ਗਿਆ ਹੈ। ਅਮਰੀਕਾ ਵਿੱਚ ਮੌਜੂਦਾ 62 ਫ਼ੀਸਦੀ ਹਿੱਸੇਦਾਰੀ 2065 ਤੱਕ 50 ਫ਼ੀਸਦੀ ਤੋਂ ਹੇਠਾਂ ਆ ਸਕਦੀ ਹੈ, ਜਦਕਿ ਕੈਨੇਡਾ ਵਿੱਚ 2030 ਤੱਕ ਈਸਾਈ ਆਬਾਦੀ 50 ਫ਼ੀਸਦੀ ਤੋਂ ਘੱਟ ਹੋਣ ਦੀ ਸੰਭਾਵਨਾ ਹੈ। ਇਸ ਦਾ ਇੱਕ ਵੱਡਾ ਕਾਰਨ ਕਿਸੇ ਵੀ ਧਰਮ ਨਾਲ ਸਬੰਧ ਨਾ ਰੱਖਣ ਵਾਲੇ ਲੋਕਾਂ ਦੀ ਵਧਦੀ ਗਿਣਤੀ ਹੈ।
ਪਿਊ ਦੇ ਅਨੁਮਾਨ ਮੁਤਾਬਕ 2020 ਤੋਂ 2070 ਦਰਮਿਆਨ ਵਿਸ਼ਵ ਦੀ ਕੁੱਲ ਆਬਾਦੀ ਵਿੱਚ 29 ਫ਼ੀਸਦੀ ਵਾਧਾ ਹੋਵੇਗਾ। ਇਸ ਸਮੇਂ ਦੌਰਾਨ ਮੁਸਲਿਮ ਆਬਾਦੀ 80 ਫ਼ੀਸਦੀ ਅਤੇ ਈਸਾਈ ਆਬਾਦੀ 30 ਫ਼ੀਸਦੀ ਵਧ ਸਕਦੀ ਹੈ। ਹਿੰਦੂਆਂ ਅਤੇ ਯਹੂਦੀਆਂ ਦੀ ਗਿਣਤੀ ਵਧਣ ਦੇ ਬਾਵਜੂਦ ਵਿਸ਼ਵ ਆਬਾਦੀ ਵਿੱਚ ਉਨ੍ਹਾਂ ਦੀ ਹਿੱਸੇਦਾਰੀ ਘਟਣ ਦਾ ਅਨੁਮਾਨ ਹੈ, ਜਦਕਿ ਬੋਧੀ ਆਬਾਦੀ ਵਿੱਚ ਕਮੀ ਆ ਸਕਦੀ ਹੈ।
ਰਿਪੋਰਟ ਅਨੁਸਾਰ ਅਫਰੀਕਾ ਆਉਣ ਵਾਲੇ ਦਹਾਕਿਆਂ ਵਿੱਚ ਆਬਾਦੀ ਦੇ ਵਾਧੇ ਦਾ ਮੁੱਖ ਕੇਂਦਰ ਬਣ ਸਕਦਾ ਹੈ। 2070 ਤੱਕ ਕਾਂਗੋ ਦੁਨੀਆ ਵਿੱਚ ਸਭ ਤੋਂ ਵੱਧ ਈਸਾਈ ਆਬਾਦੀ ਵਾਲਾ ਦੇਸ਼ ਬਣਨ ਦੀ ਸੰਭਾਵਨਾ ਹੈ। ਇਸੇ ਤਰ੍ਹਾਂ ਪਾਕਿਸਤਾਨ ਮੁਸਲਿਮ ਆਬਾਦੀ ਦੇ ਮਾਮਲੇ ਵਿੱਚ ਇੰਡੋਨੇਸ਼ੀਆ ਨੂੰ ਪਿੱਛੇ ਛੱਡ ਸਕਦਾ ਹੈ, ਜਦਕਿ ਭਾਰਤ ਦੂਜੇ ਸਥਾਨ ’ਤੇ ਰਹਿਣ ਦਾ ਅਨੁਮਾਨ ਹੈ।
ਨੋਟ: ਇਹ ਅੰਕੜੇ ਭਵਿੱਖੀ ਅਨੁਮਾਨ ਹਨ, ਮੌਜੂਦਾ ਧਾਰਮਿਕ ਆਬਾਦੀ ਦੇ ਅੰਕੜੇ ਨਹੀਂ।







