ਸੰਗਰੂਰ – ਮਣੀਮਹੇਸ਼ ਯਾਤਰਾ ਤੋਂ ਵਾਪਸ ਆ ਰਹੇ ਪੰਜਾਬ ਦੇ ਸ਼ਰਧਾਲੂਆਂ ਨਾਲ ਇੱਕ ਦਰਦਨਾਕ ਹਾਦਸਾ ਵਾਪਰਿਆ। ਹਿਮਾਚਲ ਪ੍ਰਦੇਸ਼ ਦੇ ਜ਼ਿਲ੍ਹਾ ਚੰਬਾ ਦੇ ਭਰਮੌਰ ਨੇੜੇ, ਬੀਤੀ ਰਾਤ ਇੱਕ ਸਵਿਫਟ ਕਾਰ (PB-03-AL-1138) ਰਾਵੀ ਦਰਿਆ ਵਿੱਚ ਜਾ ਡਿੱਗੀ। ਇਸ ਹਾਦਸੇ ਵਿੱਚ ਦੋ ਸ਼ਰਧਾਲੂਆਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਇੱਕ ਵਿਅਕਤੀ ਲਾਪਤਾ ਹੈ ਤੇ ਦੋ ਹੋਰ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ।
ਜ਼ਖ਼ਮੀਆਂ ਦੀ ਪਛਾਣ ਮਲ ਸਿੰਘ (36) ਪੁੱਤਰ ਬਲਵਿੰਦਰ ਤੇ ਬੰਟੀ (19) ਪੁੱਤਰ ਗੁਰਜੀਤ ਵਜੋਂ ਹੋਈ ਹੈ, ਜਿਨ੍ਹਾਂ ਨੂੰ ਤੁਰੰਤ ਚੰਬਾ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ। ਸਾਰੇ ਸ਼ਰਧਾਲੂ ਸੰਗਰੂਰ ਜ਼ਿਲ੍ਹੇ ਦੇ ਖਨੌਰੀ ਪਿੰਡ ਅਤੇ ਮੰਡੀ ਮੂਣਕ ਦੇ ਰਹਿਣ ਵਾਲੇ ਸਨ। ਮ੍ਰਿਤਕਾਂ ਵਿਚੋਂ ਇੱਕ ਦੀ ਲਾਸ਼ ਕਾਰ ਅੰਦਰੋਂ ਮਿਲੀ, ਜਦਕਿ ਦੂਜੇ ਦੀ ਲਾਸ਼ ਹਾਦਸੇ ਵਾਲੀ ਜਗ੍ਹਾ ਤੋਂ ਲਗਭਗ 15 ਕਿ.ਮੀ. ਦੂਰ ਦਰਵਾਲਾ ਖੇਤਰ ਤੋਂ ਬਰਾਮਦ ਹੋਈ। ਲਾਪਤਾ ਵਿਅਕਤੀ ਦੀ ਭਾਲ ਲਈ NDRF, ਹੋਮਗਾਰਡ ਅਤੇ ਪੁਲਿਸ ਦੀਆਂ ਟੀਮਾਂ ਵੱਲੋਂ ਸਰਚ ਆਪ੍ਰੇਸ਼ਨ ਚਲਾਇਆ ਜਾ ਰਿਹਾ ਹੈ।
ਪੁਲਿਸ ਮੁਤਾਬਕ, ਹਾਦਸਾ ਰਾਤ ਕਰੀਬ 1:30 ਵਜੇ ਪਠਾਨਕੋਟ–ਭਰਮੌਰ ਨੈਸ਼ਨਲ ਹਾਈਵੇ ‘ਤੇ ਦੁਰਗੇਠੀ ਦੇ ਧਾਈ ਦੇਵੀ ਮੰਦਰ ਨੇੜੇ ਵਾਪਰਿਆ। ਵਾਪਸੀ ਦੌਰਾਨ ਕਾਰ ਬੇਕਾਬੂ ਹੋ ਕੇ 250 ਮੀਟਰ ਹੇਠਾਂ ਖੱਡ ਵਿੱਚ ਡਿੱਗੀ ਤੇ ਸਿੱਧੀ ਦਰਿਆ ਵਿੱਚ ਜਾ ਪਹੁੰਚੀ। ਡਿੱਗਣ ਦੌਰਾਨ ਦੋ ਸਵਾਰ ਗੱਡੀ ਤੋਂ ਬਾਹਰ ਸੁੱਟੇ ਗਏ ਅਤੇ ਗੰਭੀਰ ਜ਼ਖ਼ਮੀ ਹੋਏ। ਸ਼ੁਰੂਆਤੀ ਜਾਂਚ ‘ਚ ਪਤਾ ਲੱਗਿਆ ਹੈ ਕਿ ਡਰਾਈਵਰ ਨੇ ਸੜਕ ‘ਤੇ ਅਚਾਨਕ ਆਏ ਕੁੱਤੇ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ, ਜਿਸ ਕਾਰਨ ਕਾਰ ਬੇਕਾਬੂ ਹੋਈ ਅਤੇ ਇਹ ਭਿਆਨਕ ਹਾਦਸਾ ਵਾਪਰਿਆ।
